काठमाडौं – पूर्वराष्ट्रपति विद्यादेवी भण्डारी औपचारिक रूपमा नेकपा एमालेको वरिष्ठ नेताको भूमिकामा फर्किएकी छन्। बिहीबार बसेको एमाले स्थायी कमिटीको पहिलो बैठकमा अध्यक्ष केपी शर्मा ओलीले भण्डारीलाई वरिष्ठ नेताको शपथ गराएका हुन्।
शपथसँगै भण्डारी करिब ११ वर्षपछि औपचारिक रूपमा एमालेको पार्टी राजनीतिमा फर्किएकी हुन्। एमालेको असोज ५ देखि ८ गतेसम्म बसेको केन्द्रीय कमिटी बैठकले उनलाई पार्टीको दोस्रो वरीयतामा रहने गरी वरिष्ठ नेताको जिम्मेवारी दिने निर्णय अनुमोदन गरेको थियो।
राष्ट्रपति बन्नुअघि एमालेकी उपाध्यक्ष रहेकी भण्डारी २०७२ देखि २०७९ सम्म दुई कार्यकाल राष्ट्रपति भएपछि सक्रिय पार्टी राजनीतिबाट अलग भएकी थिइन्।
राष्ट्रपतिको कार्यकाल सकिएपछि सक्रिय राजनीतिमा फर्किने घोषणा गरेकी भण्डारीको एमाले सदस्यता नवीकरण लामो समय रोकिएको थियो। २०८३ जेठमा एमाले सचिवालयले उनको सदस्यता पुनः नवीकरण गर्ने निर्णय गरेपछि पार्टीमा फर्किने बाटो खुलेको थियो।