काठमाडौँ । प्रधानमन्त्री वालेन्द्र शाहले सुनसरी लगायतका जिल्लाहरूमा उत्पन्न पछिल्लो संवेदनशील अवस्था समाधान गर्न र सामाजिक सद्भाव सुदृढ बनाउन सरकार निरन्तर लागिपरेको बताउनुभएको छ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज मधेश प्रदेशबाट प्रतिनिधित्व गर्ने सत्तारुढ दल राष्ट्रिय स्वतन्त्र पार्टी (रास्वपा) का सांसदहरूसँगको छलफलमा प्रधानमन्त्रीले सो कुरा बताउनुभएको हो। प्रधानमन्त्री शाहले राज्य संयन्त्रका सम्पूर्ण अंगहरू उच्च सतर्कताका साथ परिचालित भइसकेको उल्लेख गर्दै नागरिकलाई संयमता अपनाउन आग्रह गर्नुभयो।
सांसदहरूलाई निर्वाचन क्षेत्र खटिन आह्वान
छलफलका क्रममा प्रधानमन्त्री शाहले सबै सांसदहरूलाई आ-आफ्नो निर्वाचन क्षेत्रमा पुगेर नागरिक र राज्यबीच सद्भावको बलियो पुल बन्न आह्वान गर्नुभयो। “अप्ठ्यारो र आपत्कालीन परिस्थितिमा जनताको घरदैलोमा पुगेर उहाँहरूको दुःख-सुखमा उभिनु नै सांसदहरूको वास्तविक दायित्व हो,” प्रधानमन्त्रीले भन्नुभयो। उहाँले सरकारको प्राथमिक ध्यान प्रभावित नागरिकको सुरक्षा र घटनाको निष्पक्ष छानबिनमा रहेको स्पष्ट पार्नुभयो।
सांसदहरूको प्रतिबद्धता र सुझाव
प्रधानमन्त्रीको आह्वानलाई सकारात्मक रूपमा लिँदै सांसदहरूले आफूहरू तत्कालै निर्वाचन क्षेत्रमा खटिने प्रतिबद्धता जनाएका छन्। उहाँहरूले बिहीबार प्रधानमन्त्रीले राष्ट्रका नाममा गर्नुभएको सम्बोधनले प्रभावित क्षेत्रका नागरिकमा विश्वास र भरोसा जगाएको उल्लेख गर्नुभयो।
सांसदहरूले स्थानीय स्तरमा दीर्घकालीन शान्ति कायम राख्न धार्मिक गुरु, नागरिक समाज र स्थानीय राजनीतिक दलका प्रतिनिधिहरूसँग सघन संवाद गर्नुपर्ने सुझाव दिएका छन्। साथै, सामाजिक सञ्जालमार्फत फैलिने भ्रम र अफवाहबाट युवा वर्गलाई जोगाउन स्थानीय स्तरमा जनचेतनामूलक अभियान सञ्चालन गर्नुपर्ने आवश्यकतामा समेत सांसदहरूले जोड दिएका छन्।