२०८२ असार २७ गते शुक्रबार, काठमाडौं।
काठमाडौंको बालाजु क्षेत्रबाट प्रहरीले जुवातास खेलिरहेको अवस्थामा १० जनालाई पक्राउ गरेको छ । काठमाडौं महानगरपालिका-१६, गुम्बा चोकस्थित एक घरमा जुवा खेलिरहेको सूचनाको आधारमा प्रहरीले छापा मारेको हो ।
प्रहरी वृत्त बालाजुबाट बिहीबार दिउँसो खटिएको प्रहरी टोलीले स्थानीय ५८ वर्षीय अमृत पुलामीको घरमा छापा मारेको थियो । सो क्रममा घरधनी पुलामीसहित १० जनालाई जुवा खेलिरहेको अवस्थामा रंगेहात पक्राउ गरिएको प्रहरीले जनाएको छ ।
प्रहरीले उनीहरुको साथबाट नगद ५० हजार २ सय ९० रुपैयाँ र ४ बुक ताससमेत बरामद गरेको छ ।
पक्राउ परेका सबैलाई प्रहरी वृत्त बालाजुमा राखी थप अनुसन्धान भइरहेको जिल्ला प्रहरी परिसर काठमाडौंले जानकारी दिएको छ ।