काठमाडौँ, २ भदौ ।
नेपाल सरकार र दुर्गा प्रसाईँ नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान, नेपाल’ बीच आजदेखि औपचारिक वार्ता सुरु भएको छ। महाअभियानले उठाएका विभिन्न मागहरूको समाधान खोज्न सिंहदरबारस्थित प्रधानमन्त्री तथा मन्त्रिपरिषद्को कार्यालयमा दुवै पक्षबीच संवाद सुरु भएको हो।
सरकारले हिजो (भदौ १ गते) मात्रै प्रधानमन्त्री कार्यालयका सहसचिव लिलाधर सुवेदीको संयोजकत्वमा चार सदस्यीय वार्ता टोली गठन गरेको थियो। टोलीमा गृह मन्त्रालयका सहसचिव आनन्द काफ्ले, अर्थ मन्त्रालयका सहसचिव महेश आचार्य र भूमि व्यवस्था, सहकारी, संघीय मामिला तथा सामान्य प्रशासन मन्त्रालयका सहसचिव डिलाराम पन्थी सदस्य हुनुहुन्छ।
सरकारको वार्ता आह्वानलाई सकारात्मक रूपमा लिँदै महाअभियानका केन्द्रीय अध्यक्ष दुर्गा प्रसाईँले पनि विष्णु बोहरा क्षेत्रीको संयोजकत्वमा ९ सदस्यीय वार्ता टोली गठन गर्नुभएको छ। दुवै तर्फबाट औपचारिक टोली तयार भएपछि आजदेखि मागहरूका विषयमा बुँदागत छलफल र संवादको प्रक्रिया अगाडि बढेको हो।
महाअभियानले लामो समयदेखि संघीयताको खारेजी, धार्मिक स्वतन्त्रता, र नागरिकका आर्थिक समस्या समाधान लगायतका विभिन्न माग राखी आन्दोलन गर्दै आएको थियो। आजको वार्तालाई समस्या समाधानको दिशामा एक महत्त्वपूर्ण कदमका रूपमा हेरिएको छ।