२०८२ भाद्र २२ गते आइतबार, काठमाडौं।
कास्की, पोखरा महानगरपालिका-२५ हेम्जा सुन्दरपुरी चोकस्थित म्याग्दी मालिका गाउँपालिका-५ घर भएका धिरेन पूर्जाले सञ्चालन गरेको ‘होटल म्याग्दी’ मा छापा मारी प्रहरीले ९ जना जुवाडेलाई पक्राउ गरेको छ। शनिबार दिउँसो भएको यस कारबाहीमा होटल सञ्चालक धिरेन पूर्जा पनि सामेल छन्।
जिल्ला प्रहरी कार्यालय कास्की र वडा प्रहरी कार्यालय बगरबाट खटिएको विशेष प्रहरी टोलीले होटलमा जुवातास खेलिरहेको अवस्थामा उनीहरूलाई रंगेहात पक्राउ गरेको हो। प्रहरीले घटनास्थलबाट नगद ८५ हजार ७ सय ९० रुपैयाँ र ४ बुक तास बरामद गरेको छ।
पक्राउ परेका सबै जनामाथि जुवा ऐनअन्तर्गत थप अनुसन्धान भइरहेको जिल्ला प्रहरी कार्यालय कास्कीले जनाएको छ। प्रहरीले अवैध जुवातास नियन्त्रणका लागि सक्रिय रूपमा लागिपरेको बताएको छ।