काठमाडौँ ।
नेपाल प्रहरीले पछिल्लो समय अनलाइन सट्टेबाजी (बेटिङ) र अवैध क्रिप्टोकरेन्सी कारोबारविरुद्धको कारबाहीलाई तीव्र पारेको छ । प्रविधिको दुरुपयोग गरी भइरहेका यस्ता आपराधिक गतिविधि नियन्त्रण गर्न प्रहरीले निगरानी र पक्राउ प्रक्रियालाई बढावा दिएको हो ।
हालैका घटनाहरूमा १७ करोड ७९ लाख रुपैयाँ बराबरको क्रिप्टो कारोबार गर्ने चिनियाँ नागरिक झु यी फेङ र ३० लाखभन्दा बढीको कारोबार गर्ने बंगलादेशी नागरिक एमडी शेहाबुल इस्लामसहित नेपाली युवाहरू पक्राउ परेका छन् । प्रहरी तथ्याङ्कअनुसार आर्थिक वर्ष २०८२/०८३ मा मात्रै अनलाइन बेटिङमा ४८ जना र क्रिप्टोकरेन्सी कारोबारमा ४२ जना पक्राउ परिसकेका छन् । अघिल्ला वर्षहरूमा पनि सयौँको संख्यामा स्वदेशी तथा विदेशी नागरिकहरू यस्तो अवैध धन्दामा संलग्न रहेको पाइएको छ ।
नेपाल प्रहरीका केन्द्रीय प्रवक्ता प्रहरी नायव महानिरीक्षक (DIG) अबि नारायण काफ्लेका अनुसार, डिजिटल वालेट र बैंकिङ प्रणालीमार्फत हुने शंकास्पद कारोबारमाथि प्रहरीले सूक्ष्म निगरानी राखिरहेको छ । विशेष गरी खेलकुद प्रतियोगिताका बेला सक्रिय हुने बेटिङ नेटवर्क र क्रिप्टो कारोबारले ठगी तथा हुण्डीलाई समेत प्रश्रय दिने गरेको प्रहरीको ठहर छ ।
कानुनी सजायको व्यवस्था:
प्रचलित कानुनअनुसार सट्टेबाजी गर्नेलाई १ वर्षसम्म कैद र १० हजार रुपैयाँ जरिवाना हुने व्यवस्था छ भने ठगी प्रमाणित भएमा १० वर्षसम्म कैद र १ लाख रुपैयाँसम्म जरिवाना हुन सक्छ । यस्तै, अवैध क्रिप्टोकरेन्सी कारोबारमा संलग्न हुनेलाई ५ वर्षसम्म कैद र बिगो बमोजिम जरिवाना हुने कानुनी प्रावधान रहेको छ । प्रहरीले यस्ता अवैध गतिविधिमा नलाग्न सर्वसाधारणलाई सचेत समेत गराएको छ ।