काठमाडौँ । सञ्चार तथा सूचना प्रविधिमन्त्री डा. विक्रम तिमिल्सिनाले पत्रकारिता क्षेत्रलाई थप सबल, जिम्मेवार र विश्वसनीय बनाउन बलियो कानुन आवश्यक रहेको बताउनुभएको छ। बुधबार अनलाइन पत्रकार सङ्घसँगको छलफलमा उहाँले सरकारले आमसञ्चार र मिडिया काउन्सिल विधेयकलाई सरोकारवालाको सुझावका आधारमा अघि बढाउने जानकारी दिनुभयो।
मन्त्री तिमिल्सिनाले डिजिटल माध्यमको बढ्दो प्रयोगसँगै सामाजिक सञ्जालमा देखिने भ्रामक सूचना र ‘हेट स्पीच’ नियन्त्रणका लागि कानुनी व्यवस्था समयानुकूल बनाइने स्पष्ट पार्नुभयो। सरकारले पत्रकारितालाई नियन्त्रण नभई सुदृढ बनाउन चाहेको र राज्यले यसमा हस्तक्षेप नगर्ने उहाँको भनाइ थियो।
सो अवसरमा सङ्घका प्रतिनिधिहरूले अनलाइन सञ्चारमाध्यमलाई पनि समान रूपमा लोककल्याणकारी विज्ञापन उपलब्ध गराउन र पत्रकारको क्षमता विकासमा ध्यान दिन सरकारलाई सुझाव दिएका थिए।