१७ असार, काठमाडौँ ।
शिक्षा, प्रविधि र सार्वजनिक नीतिका क्षेत्रमा लामो अनुभव सँगाल्नुभएका विज्ञ शैलेन्द्र झा शिक्षा तथा खेलकुद मन्त्रालयको सल्लाहकारमा नियुक्त हुनुभएको छ । शिक्षा प्रणालीमा नीतिगत सुधार र शैक्षिक नवप्रवर्तनका लागि मन्त्रालयले झालाई नियुक्त गरेको हो ।
अनुभवी र विज्ञ व्यक्तित्व
झा हाल अमेरिकी विदेश मन्त्रालयको प्रतिष्ठित ‘ह्युबर्ट एच. हम्फ्रे फेलोसिप’ अन्तर्गत अमेरिकाको भ्यान्डरबिल्ट विश्वविद्यालयमा सार्वजनिक नीति तथा सुशासन विषयमा अध्ययन र अनुसन्धानमा संलग्न हुनुहुन्छ । उहाँसँग शिक्षा प्रशासन, रणनीतिक योजना र डिजिटल शिक्षाका क्षेत्रमा अन्तर्राष्ट्रिय स्तरको अनुभव रहेको छ ।
काठमाडौँ महानगरमा सफल नेतृत्व
यसअघि काठमाडौँ महानगरपालिकाको शहरी योजना आयोगमा बोर्ड सदस्यका रूपमा रहँदा झाले शिक्षा क्षेत्रमा धेरै चर्चित कार्यक्रमहरूको नेतृत्व गर्नुभएको थियो । उहाँको नेतृत्वमा ‘बुक फ्रि फ्राइडे’ (पुस्तकविहीन शुक्रबार), सीप मेला, विद्यालय सौन्दर्यीकरण र शिक्षक क्षमता विकासजस्ता कार्यक्रमहरू सफलतापूर्वक सञ्चालन भएका थिए ।
यसका साथै उहाँले ‘टिचर्स फर नेपाल’ मा आठ वर्ष र ‘बीआइटीएस लिडर इन्टरनेश्नल’ को संस्थापक अध्यक्षका रूपमा युवा उद्यमशीलता र स्मार्ट लर्निङका क्षेत्रमा महत्वपूर्ण योगदान दिनुभएको छ ।
शैक्षिक पृष्ठभूमि र अन्तर्राष्ट्रिय छवि
झाले जर्मनीबाट सूचना तथा सञ्चार इन्जिनियरिङ, फिलिपिन्सबाट विकास व्यवस्थापन र बंगलादेशबाट एप्लाइड इकोनोमिक्समा स्नातकोत्तर गर्नुभएको छ । उहाँले विभिन्न अन्तर्राष्ट्रिय मञ्चहरूमा शिक्षा र नवप्रवर्तनका विषयमा नेपालको प्रतिनिधित्व गरिसक्नुभएको छ ।
मन्त्रालयको अपेक्षा
झाको नियुक्तिसँगै नेपालको विद्यालय शिक्षामा सुधार, डिजिटल शिक्षाको विस्तार, सीपमूलक शिक्षा र अनुसन्धानमा आधारित नीति निर्माणमा नयाँ गति मिल्ने अपेक्षा गरिएको छ । मन्त्रालयले उहाँको विज्ञतालाई शिक्षा क्षेत्रको संस्थागत र नीतिगत रूपान्तरणमा प्रयोग गर्ने लक्ष्य लिएको छ ।