नुवाकोट । सूचना तथा सञ्चारमन्त्री डा. विक्रम तिमिल्सिनाले आगामी आर्थिक वर्ष २०८३/८४ को बजेटले युवापुस्ताको सुशासन, समृद्धि र परिवर्तनको आकांक्षालाई सम्बोधन गर्ने बताउनुभएको छ । नुवाकोटको तादी र शिवपुरी गाउँपालिकामा आयोजित राष्ट्रिय स्वतन्त्र पार्टी (रास्वपा) को पहिलो पालिका अधिवेशनलाई सम्बोधन गर्दै उहाँले यस्तो बताउनुभएको हो ।
मन्त्री तिमिल्सिनाले यसपटकको बजेट विगतको जस्तो छरिएको र उद्देश्यविहीन नभई राष्ट्रिय आवश्यकता र विकासको स्पष्ट मार्गचित्रसहित आएको दाबी गर्नुभयो । सरकारले निर्वाचनका बेला जनतासामु गरेका प्रतिबद्धता पूरा गर्न नतिजामुखी भएर काम गरिरहेको उहाँको भनाइ थियो ।
समाचारका मुख्य बुँदाहरू:
-
भ्रष्टाचारविरुद्ध कडा कदम: सरकारको मुख्य प्राथमिकता भ्रष्टाचार, अनियमितता र बिचौलियातन्त्रको अन्त्य गर्नु रहेको र गलत काम गर्नेहरू अब उम्किन नपाउने चेतावनी ।
-
डिजिटल रूपान्तरण: देशभरको मोबाइल नेटवर्क समस्या समाधान गरी ‘डिजिटल डिभाइड’ अन्त्य गर्ने र दूरसञ्चार क्षेत्रलाई व्यवस्थित बनाउने योजना ।
-
नागरिक केन्द्रित शासन: शासन व्यवस्थालाई सीमित स्वार्थ समूहको घेराबाट मुक्त गरी आम नागरिकको हितमा केन्द्रित गर्ने सरकारको लक्ष्य ।
-
समावेशी विकास: नुवाकोटको पर्यटन विकास र स्थानीय समस्या समाधानका लागि सक्रिय पहल गर्ने तथा समावेशी विकासमार्फत समृद्धि हासिल गर्ने प्रतिबद्धता ।
मन्त्री तिमिल्सिनाले कर्मचारी संयन्त्रलाई राजनीतिक प्रभावबाट मुक्त गराई प्रभावकारी बनाउने र विकासको लाभ सबै नागरिकसम्म पुर्याउन सरकार प्रतिबद्ध रहेको समेत उल्लेख गर्नुभयो ।