काठमाडौंको चन्द्रागिरी नगरपालिका-१५ विष्णु देवीबाट प्रहरीले ठूलो परिमाणमा नियन्त्रित लागूऔषधसहित दुई जनालाई पक्राउ गरेको छ । पक्राउ पर्नेहरूमा कीर्तिपुर बस्ने २५ वर्षीय सजिन महर्जन र २२ वर्षीय मनोज देउला रहेका छन् ।
शनिबार दिउँसो प्रहरी वृत्त थानकोटबाट खटिएको प्रहरी टोलीले चेकजाँच गर्ने क्रममा उनीहरूलाई ३ सय ट्याब्लेट नाइट्राजेपाम (Nitrazepam) सहित नियन्त्रणमा लिएको हो । बा.९२ प ४२५० नम्बरको मोटरसाइकलमा सवार उनीहरूलाई शंका लागेर खानतलासी गर्दा उक्त प्रतिबन्धित लागूऔषध फेला परेको प्रहरीले जनाएको छ ।
पक्राउ परेका दुवै जनामाथि लागूऔषध नियन्त्रण ऐन बमोजिम थप अनुसन्धान भइरहेको प्रहरीले जानकारी दिएको छ ।