काठमाडौँ: राप्ती स्वास्थ्य विज्ञान प्रतिष्ठान, दाङका तत्कालीन उपकुलपति प्रा.डा. संगिता सिंह भण्डारीसहित १७ जना र एक आपूर्ति कम्पनीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।
१२८ स्लाइसको सिटी स्क्यान (CT Scan) मेसिन खरिद गर्दा मिलेमतो गरी कम गुणस्तरको मेसिन खरिद गरेको र आर्थिक अनियमितता गरेको पुष्टि भएपछि आयोगले आज आरोपपत्र दायर गरेको हो।
प्रतिवादीहरू:
मुद्दा दायर गरिएकाहरूमा उपकुलपति भण्डारी, तत्कालीन का.मु. रजिष्ट्रार कैलाश प्रसाद देव, निर्देशक डा. सागर पन्थी, रेडियोलोजी प्रमुख डा. बोम वि.सी., विभिन्न इन्जिनियरहरू, लेखा र शाखा अधिकृतहरू तथा हिमालयन मेडिटेक प्रा.लि.का सञ्चालकहरू अमर श्रेष्ठ र सन्जु राजकर्णिकार रहेका छन्।
आयोगले कुल ७ करोड ३१ लाख ८२ हजार ९८५ रुपैयाँ भुक्तानी भइसकेको खरिद प्रक्रियामा भ्रष्टाचार निवारण ऐन, २०५९ बमोजिम सजाय र बिगो असुलउपर गर्न मागदाबी गरेको छ।