काठमाडौं । वैदेशिक रोजगारीका लागि पोर्चुगल पठाइदिने प्रलोभन देखाइ रकम ठगी गरेको आरोपमा प्रहरीले एक जनालाई पक्राउ गरेको छ ।
पक्राउ पर्नेमा कञ्चनपुरको बेदकोट नगरपालिका-१० घर भई हाल काठमाडौं महानगरपालिका-२६ बस्ने ३३ वर्षीय भिम बहादुर महर रहेका छन् ।
महरले एक जना पीडितलाई पोर्चुगलमा आकर्षक तलब हुने काममा पठाइदिन्छु भन्दै २ लाख रुपैयाँ लिएर सम्पर्कविहीन भएको उजुरी परेको थियो । सोही उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले उनलाई शुक्रबार काठमाडौंको सुकेधाराबाट नियन्त्रणमा लिएको हो ।
पक्राउ परेका महरलाई आवश्यक अनुसन्धान तथा कारवाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।