काठमाडौँ: वैदेशिक रोजगारीका लागि विभिन्न देश पठाइदिन्छु भन्दै लाखौँ रुपैयाँ ठगी गरेको अभियोगमा प्रहरीले तीन जनालाई पक्राउ गरेको छ। काठमाडौँ उपत्यका अपराध अनुसन्धान कार्यालय टेकुको टोलीले उनीहरूलाई काठमाडौँका विभिन्न स्थानबाट पक्राउ गरेको हो।
पक्राउ पर्नेहरूमा नुवाकोटका ३८ वर्षीय कृष्णजी थापा, सप्तरीका २२ वर्षीय अनिल कुमार साह र ललितपुरका ३० वर्षीय विवेक भुजेल रहेका छन्।
कसले कति ठगी गरे?
-
कृष्णजी थापा: युएई पठाइदिन्छु भन्दै एक जनाबाट ६ लाख ३० हजार रुपैयाँ।
-
अनिल कुमार साह: क्यानडा पठाइदिन्छु भन्दै १८ लाख रुपैयाँ।
-
विवेक भुजेल: युएई पठाइदिन्छु भन्दै दुई जनाबाट ३ लाख ५० हजार रुपैयाँ।
पीडितहरूबाट रकम लिएर सम्पर्कविहीन भएपछि परेको उजुरीका आधारमा उनीहरूलाई सोमबार र मंगलबार पक्राउ गरिएको प्रहरीले जनाएको छ। पक्राउ परेका तीनै जनालाई थप अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको छ।