आगामी फागुन २१ गते हुने प्रतिनिधिसभा सदस्य निर्वाचनको सुरक्षाका लागि नेपाल प्रहरीले नेपाली सेनासँग २,८०० थान साना हतियार (पेस्तोल) सापटी मागेको छ । निर्वाचन सम्पन्न भएपछि फिर्ता गर्ने सर्तमा जङ्गी अड्डासँग माग गरिएको उक्त प्रस्तावलाई सेनाले स्वीकृत गरिसकेको छ ।
प्रहरी प्रधान कार्यालयका अनुसार, सेनाबाट प्राप्त हुने यी पेस्तोलहरू सातै प्रदेशमा पठाइनेछ र आवश्यकता अनुसार निर्वाचन सुरक्षामा खटिने टोलीले प्रयोग गर्नेछन् ।
नेपाल प्रहरीले आफ्ना कर्मचारीका लागि पर्याप्त पेस्तोल नभएपछि विगतका निर्वाचनहरूमा पनि सेनासँग हतियार सापटी लिने गरेको थियो । यसअघि २०७९ सालको स्थानीय तह निर्वाचन र मंसिर ४ को आम निर्वाचनमा पनि प्रहरीले सेनासँग २,८०० थान चिनियाँ पेस्तोल सापटी लिएर सुरक्षा व्यवस्था मिलाएको थियो ।